露荀百合炒三文魚....蜜汁煎豬扒

8月8日~~酷熱  澳門~35度

難得又可以同皇上去吃喝玩樂, 我緊係安排好哂D行程啦 首先我哋坐1點船去澳門, ,不過,唔知係唔係天鵝後遺症, 個海好大浪呀! 極少暈船浪嘅我都頂唔順

行程第一站:

食翅  添發碗仔翅美食~

福隆新街18號地下 1:00PM -23:00  電話: 2838-9265 / 6650-8211

呢間係我幫襯咗好耐嘅小食店, 不過, 佢嘅小食一D都唔簡單, 我以前食係$10/ $15/ $25 咋 而家佢只係搬過咗幾間舖, 就變得好貴啦! 但係就多咗好多款式, 而且佢都係真翅嚟! 雖然翅嘅品質無其他咁靚,但係我覺得食過就OK啦仲有呀! 記得買支~靈芝雞骨草飲吓! 味道甘甘地, 不過下火啊 ! 可以堂食或外買, 坐位只有20幾個, 而且好迫, 要排隊啊!

跟住我就去咗酒店check-in, 再出返去議事亭前打過白鴿轉, 行吓街買吓嘢, 然後再去 滔滔咖啡食個~芝士辣魚包 $11.5 仲有我覺得好好味嘅雪糕, Lemoncello 檸檬車露 + 蜜桃芒果 (大堂巷11號地下11:00-23:00)

行程第二站:

新豪天地 (威尼斯人對面~正門出1條馬路之隔)

嘩 一入到去Hard Rock正門, 好有feel呀! 香噴噴, 而且無威尼斯人咁多人好似大型大陸商場咁...( 可能仲新呱)

嚟呢度最主要係想睇佢哋嘅 天幕show ~ 龍騰, 如果係佢哋本身主客就可以睇即埸show, 如果唔係的話佢哋都會派張晚上22:00嘅票比你, 但係如果你想睇即埸,可以每消費$120就有2張啦!

show time : 每30分鐘一埸, 每場10分鐘

我覺得值得一看, 好似喺一個小型太空館, 睇咗埸企位戲咁, 不過, 套戲係360度旋轉播放

然後我就去佢嘅賭場捐贈一吓 ...兩日加埋喺度放底咗$1,100蚊呀  但係唔知係唔係夜晚呢? 佢哋賭場播嘅音樂, 係 Rock & Roll 喎! 而且我仲見d工作人員有時跟住d音樂擺返兩吓! 感覺幾好, 唔係好似其他賭埸咁, 嘈到死, 不過, 我第2日下午去就多人好多啦!

捐完款大傷元氣之後, 緊係要補補身啦!

行程第三站:

新明珠美食之家~(水佬榮)

巴波沙大馬路97號 18:00-04:00AM 電話: 2859-6396 平均消費$160-180

相信好多人都食過, 我仲意嚟呢度食宵夜, 由其我喜歡食辣  今次都係食例牌嘢~~辣汁花甲蟹煲 / 黃金蝦 / 蜆芥墨魚球

行程第四站:

新葡京~~ 食完宵夜, 大家又話想去捐款喎! 今次捐咗$500捐完款咁緊係要同何生打個招呼啦! 酒店大堂就有佢嘅銅像, 仲有12銅首之一 ~~~ 馬首

最後零晨04:30 先返酒店瞓覺

8月2日係我寶貝姨娚女嘅生日, 我當然要同佢慶祝吓! 佢話除咗要BBQ之外, 要再加一個天使蛋糕自己裝飾喎! 好呀! 就比你玩吓啦!

另外我亦預備咗好多BBQ美食招呼大家~~

奶油扇貝, 蒜蓉焗蝦, 白酒花甲, 糖心蕃薯, 甜粟米, 黑椒豬扒, 薑汁豬扒, 香草雞翼, 多春魚......好多啊!

嗰一晚大人同小朋友都玩得好開心, 最重要係我個寶貝女~高興~~~

諗吓諗吓....其實我真係幾多嗜好, 插花係其中之一, 通常我哋星期六都會去花墟逛吓, 今次見到太陽花好靚, 就帶你返屋企坐吓啦!

呵呵! 終於買咗啦! 經過我細心考慮之後, 我決定買呢個嚟招呼朋友留宿, 因為我哋喺荷蘭媽媽屋企都係瞓呢種充氣床墊, 感覺都唔錯, 最重要係唔阻住我屋企, 方便收藏 

呵呵! 23/7去咗書展尋寶, 真係好多人啊! 仲有好多都係龍友...好鬼熱鬧, 我首先去咗兒童天地先, 因為想睇吓有乜文具好嘢, 然後再去返Hall 1. 嘩 真係好多人呀! 我比人踩咗3次腳 本來想去聽偶像~翁靜晶嘅演講, 唉 都係算數, 實在太迫啦!

好彩 我都有收穫 ~~ 21本食譜 + 1本脊椎健康書 + 1本家事百科

前兩日煮咗一餐~~~美味晚餐~~~

白酒煮青口~~由於新鮮青口有海水味, 所以好鮮甜, 煮嘅時候唔需要落鹽, 用少許黑胡椒同2-3滴檸檬汁調味, 然後用適量清水煮至7分熟, 落白酒再滾2分鐘, 食得!!!

燒汁大蝦 & 三文魚鰭 ~~~ 兩款材料分別用黑胡椒同少許鹽調味, 三文魚鰭可落2-3滴檸檬汁, 用牛油將所有材料煎至8成熟, 下燒汁燴2分鐘即成. 如用濃調嘅燒汁, 請先調稀, 否則會煮濃及太咸. ( 唔記得影相 )

香草烤羊架~~~ 先將羊架抹乾水,用少許鹽,黑胡椒及意大利香草醃30分鐘, 用牛油略煎香羊架兩邊, 放入已預熱200度之焗爐內, 烤焗12-14分鐘即成, 吃時可加 mint jelly.

南瓜薯仔洋蔥肉粒湯~~~ 將所有材料切粒,肉粒先用少許鹽略醃15分鐘, 預備一煲滾水, 將所有材料炒香, 然後放入滾水內煲45分鐘, 熄火調味即成.

P.S. 如果想南瓜做出嚟肉質鬆軟, 可先在南瓜上撒上砂糖, 待3小時候, 然後先炖煮, 做出嚟嘅南瓜會比較鬆軟有口感.

噚晚同我家皇上去食咗一個溫馨晚餐 

記得同皇上一齊呢幾年, 除咗第一年, 佢係會為所有節日去安排慶祝之外, 之後呢幾年真係...唉!?!?!?! 有d男人真係同居咗之後就變啦 不過, 佢好彩, 我唔係好介意. 反正佢安排親嗰d, 我都唔係好滿意, 不如就由我去安排, 全部都係我自己仲意食嘅同玩嘅  

但係噚晚就唔同啦! 我揸車去數碼港接佢放工, 本來我想去食齋 ( 幾奇怪,生日慶祝食齋 ) 點知皇上一上車就好man咁話: [ 去灣仔三里屯~ Pomme de Terre 食啦! ] 嘩!! 嗰剎那我覺得佢似反我初相識嘅皇上呀! 好man啊 我梗係即刻話好啦! 而且我哋仲一邊食一邊講返好多開心嘢, 又傾吓我哋嘅旅行大計....真係好溫馨..

個鵝肝超好味 個洋蔥湯都唔錯

今天是我的38歲生日收到很多朋友的祝福, 好感動呢

我也祝願各位鮮奶國的國民身體健康,生活愉快

每年生日我都會送一份禮物比自己, 有時會係一樣想買好耐嘅物品, 有時會係一餐好美味嘅晚餐, 有時會係獎勵自己,可以轉換新髮型....總括嚟講, 無乜直接得著.

但係今年, 因為朋友轉寄一篇文章,再加上一個颱風,我送了一份非常特別, 而且實用的禮物給自己~~~健康的開始

文章故事令我有所啟發,為了我自己,也為了我所愛的人, 我需要~健康~

颱風令我脊椎骨舊患又再痛楚不已, 我需要~健康~

由於十幾廿年前工作關係, 因為自己用錯方法拿一箱A4紙, 扭傷腰骨更錯的是~我去睇了一個無良的跌打醫師, 把我傷上加傷~~腰骨給醫師再扭傷d, 就在醫館內, 我要call救護車去醫院, 留院8天, 之後要時時做物理治療.....

由於工作關係, 時時都配合唔到醫院嘅物理治療時間, 慢慢就無再去做了 亦都因為自己的疏忽, 一直我都腰酸背痛, 而且年紀越大, 痛楚亦越來越頻密, 可以說, 沒有一天我係舒服過...

昨日, 我終於忍受唔住, 去咗照 X-Ray, 攞完報告之後, 嚇咗一跳

醫生報告 :  頸椎~應有的弧度沒有了, 變了一條直直的, 而且骨與骨的距離疏離了; 脊椎骨~全條向右傾斜彎曲, 更向外彎, 由於骨的連接位疏離比較嚴重,腰間位置開始有骨刺; 盤骨~正常人應該是34度角,而我是40度角而且向右傾斜.

醫生見到都覺得驚訝, 問我怎能忍受, 因為脊椎骨的傾斜和彎曲, 壓住我很多神經線, 更有一個位置是壓向心臟, 所以有時會令我呼吸唔暢順, 也令我會有手腳麻痺, 頭痛, 手腳酸痛等, 很多種不同痛症出現, 而且亦影響我每日睡眠時間 ( 對呀!我每日都會周身骨痛, 有時根本痛得難以入睡)

經過醫生詳細嘅解釋, 我決定由這個生日起, 好好對待我自己, 我要改變飲食習慣, 改變自己的坐姿, 行路的姿勢, 瞓覺的睡姿, 更要每天做一些物理治療的運動, 配帶腰封.

希望能夠慢慢將脊椎骨移回原位, 雖然這不是一件短時間可以做到的事, 但這次我一定會堅持到底, 因為我要對自己好一點, 愛自己多一點, 我才有能力去照顧我所愛的人, 而且醫好了, 最舒服和開心的, 必然是我

我亦想親這次機會, 改變一下自己的生活同飲食習慣, 令自己更健康..