前兩日煮咗一餐~~~美味晚餐~~~

白酒煮青口~~由於新鮮青口有海水味, 所以好鮮甜, 煮嘅時候唔需要落鹽, 用少許黑胡椒同2-3滴檸檬汁調味, 然後用適量清水煮至7分熟, 落白酒再滾2分鐘, 食得!!!

燒汁大蝦 & 三文魚鰭 ~~~ 兩款材料分別用黑胡椒同少許鹽調味, 三文魚鰭可落2-3滴檸檬汁, 用牛油將所有材料煎至8成熟, 下燒汁燴2分鐘即成. 如用濃調嘅燒汁, 請先調稀, 否則會煮濃及太咸. ( 唔記得影相 )

香草烤羊架~~~ 先將羊架抹乾水,用少許鹽,黑胡椒及意大利香草醃30分鐘, 用牛油略煎香羊架兩邊, 放入已預熱200度之焗爐內, 烤焗12-14分鐘即成, 吃時可加 mint jelly.

南瓜薯仔洋蔥肉粒湯~~~ 將所有材料切粒,肉粒先用少許鹽略醃15分鐘, 預備一煲滾水, 將所有材料炒香, 然後放入滾水內煲45分鐘, 熄火調味即成.

P.S. 如果想南瓜做出嚟肉質鬆軟, 可先在南瓜上撒上砂糖, 待3小時候, 然後先炖煮, 做出嚟嘅南瓜會比較鬆軟有口感.

噚晚同我家皇上去食咗一個溫馨晚餐 

記得同皇上一齊呢幾年, 除咗第一年, 佢係會為所有節日去安排慶祝之外, 之後呢幾年真係...唉!?!?!?! 有d男人真係同居咗之後就變啦 不過, 佢好彩, 我唔係好介意. 反正佢安排親嗰d, 我都唔係好滿意, 不如就由我去安排, 全部都係我自己仲意食嘅同玩嘅  

但係噚晚就唔同啦! 我揸車去數碼港接佢放工, 本來我想去食齋 ( 幾奇怪,生日慶祝食齋 ) 點知皇上一上車就好man咁話: [ 去灣仔三里屯~ Pomme de Terre 食啦! ] 嘩!! 嗰剎那我覺得佢似反我初相識嘅皇上呀! 好man啊 我梗係即刻話好啦! 而且我哋仲一邊食一邊講返好多開心嘢, 又傾吓我哋嘅旅行大計....真係好溫馨..

個鵝肝超好味 個洋蔥湯都唔錯

今天是我的38歲生日收到很多朋友的祝福, 好感動呢

我也祝願各位鮮奶國的國民身體健康,生活愉快

每年生日我都會送一份禮物比自己, 有時會係一樣想買好耐嘅物品, 有時會係一餐好美味嘅晚餐, 有時會係獎勵自己,可以轉換新髮型....總括嚟講, 無乜直接得著.

但係今年, 因為朋友轉寄一篇文章,再加上一個颱風,我送了一份非常特別, 而且實用的禮物給自己~~~健康的開始

文章故事令我有所啟發,為了我自己,也為了我所愛的人, 我需要~健康~

颱風令我脊椎骨舊患又再痛楚不已, 我需要~健康~

由於十幾廿年前工作關係, 因為自己用錯方法拿一箱A4紙, 扭傷腰骨更錯的是~我去睇了一個無良的跌打醫師, 把我傷上加傷~~腰骨給醫師再扭傷d, 就在醫館內, 我要call救護車去醫院, 留院8天, 之後要時時做物理治療.....

由於工作關係, 時時都配合唔到醫院嘅物理治療時間, 慢慢就無再去做了 亦都因為自己的疏忽, 一直我都腰酸背痛, 而且年紀越大, 痛楚亦越來越頻密, 可以說, 沒有一天我係舒服過...

昨日, 我終於忍受唔住, 去咗照 X-Ray, 攞完報告之後, 嚇咗一跳

醫生報告 :  頸椎~應有的弧度沒有了, 變了一條直直的, 而且骨與骨的距離疏離了; 脊椎骨~全條向右傾斜彎曲, 更向外彎, 由於骨的連接位疏離比較嚴重,腰間位置開始有骨刺; 盤骨~正常人應該是34度角,而我是40度角而且向右傾斜.

醫生見到都覺得驚訝, 問我怎能忍受, 因為脊椎骨的傾斜和彎曲, 壓住我很多神經線, 更有一個位置是壓向心臟, 所以有時會令我呼吸唔暢順, 也令我會有手腳麻痺, 頭痛, 手腳酸痛等, 很多種不同痛症出現, 而且亦影響我每日睡眠時間 ( 對呀!我每日都會周身骨痛, 有時根本痛得難以入睡)

經過醫生詳細嘅解釋, 我決定由這個生日起, 好好對待我自己, 我要改變飲食習慣, 改變自己的坐姿, 行路的姿勢, 瞓覺的睡姿, 更要每天做一些物理治療的運動, 配帶腰封.

希望能夠慢慢將脊椎骨移回原位, 雖然這不是一件短時間可以做到的事, 但這次我一定會堅持到底, 因為我要對自己好一點, 愛自己多一點, 我才有能力去照顧我所愛的人, 而且醫好了, 最舒服和開心的, 必然是我

我亦想親這次機會, 改變一下自己的生活同飲食習慣, 令自己更健康..

以下是一則朋友在facebook上轉載的感動故事, 與大家一起分享~~~

照片中的女孩是凱蒂，21歲。而躺在隔壁的是她的未婚夫尼克，23歲。 這張照片是他們在美國舉行婚禮不久後，與 2005年1月11日 所拍的。凱蒂患有末期癌症，一天需要花上幾個小時做治療。尼克在照片裡正在等待著她完成化療。

儘管肉體多麼的疼痛、內臟逐漸地衰弱和打了多少的嗎啡針，凱蒂還是堅持舉行婚禮、甚至著手籌備。她的婚紗因為體重不斷地減輕需要一改再改。

在婚禮排隊上出現的格格不入的物品，就是凱蒂在典禮以及接待的時候所使用的氧氣桶。照片裡的另一對男女就是尼克的父母。他們很高興看到兒子娶到了他高中時代的情人。

凱蒂坐著輪椅戴著氧氣管，聽著她的丈夫和她的朋友為她高歌一曲。

在接待的時候，凱蒂需要間接的休息。她肉體上的疼痛不允許她長時間站著。

凱蒂在她婚禮後5天便去世了。看著一個病得這麼重和如此虛弱的女生帶著幸福的笑容結婚讓我們不禁想到... 人是可以得到幸福的，儘管它是如此的短暫。我們不應該在把我們的人生搞得這麼複雜。

人生短暫
打破常規
寬恕與諒解
吻得熱情、愛得真切
時常歡笑
不斷地微笑
不管生命多麼無常
即使生命不是我們想像的像個派對
可是只要我們還活著，我們應該帶著笑容心存感激

噚日係我家新居宴客嘅好日子, 點知有颱風仲要黃昏開始狂風大雨 真係擔心  約會要取消呀! 因為好多位都係由好遠嘅地區走入嚟元朗, 而且仲帶埋一家大細, 仲有狗狗呢

但係一班好友都唔怕大風雨齊齊嚟熱鬧, 真係感動 多謝你哋呀

大家咁捧場, 我一定對大家好好嘅, 美食當然不可少啦! 天氣咁悶熱而且家中係開放式廚房, 唔想朋友仔吸入太多油煙, 所以我做咗好多款凍食, 而我因為要招呼好友們, 有好多都無影相呀!

16人嘅美食包括有~~

花膠花菇鴨掌炆海蔘, 蒜辣黑胡椒枝荳, 怪味冰花枝, 酒醉糖心蛋, 紹興醉雞, 滷牛展, 甜酸凍蝦, 清蒸青班, 帶子凱撒沙拉, 元貝響螺老雞湯, 鮮雜果蒟蒻, 義大利蛋白榴槤雪糕

呵呵! 玩完啦! 個天原來都識做 ~美~ 多謝 伯伯~~

我哋玩到條樓梯濕哂! Princess仲喺我最唔覺眼嘅時候, 跑咗落屋企入面~~狂奔~~, 全屋都係水  不過, 佢哋個個都玩得好鬼開心, 就算我做餐 ~死~ 都係抵o架!

噚日去咗玩具反斗城, 幫兩個寶貝女買玩具, 因為而家個天台仲未種花, 見咁鬼空曠, 天氣又咁熱, 而且我又唔敢帶佢哋去狗公園玩 (怕佢哋中暑呀) 所以我就諗吓有乜可以令兩個女喺屋企, 都可以尋~開心~ 

玩水啦! 玩水可以消暑, 就一個水池加3枝水槍啦!  .....點知....噚晚我特登吹好個水池, 諗住晨早起身同佢哋玩, 今朝就落雨, 我而家等緊太陽呀 

首先比佢哋同玩具聯絡吓感情先~~

搬咗新屋之後, 每日煮飯都好似想焗死自己咁呀因為新屋開放式廚房, 其實以前曾經有個家都係開放式, 不過唔覺熱, 我以為都係一樣啦! 點知今年天氣唔單只熱, 仲要無風加悶焗攪到我而家要煮d簡單嘢, 一係就蒸嘢, 煎炸嘢就越少越好, 我好唔開心呀

今朝原本好想食字母粉加火腿絲同粟米粒, 但係諗諗吓, 都係唔好一早攪到自己~就身汗, 做個沙拉算數....

煙三文魚芝士凱撒沙拉~~

話說因為我要搬新屋, 所以我將一些舊咗嘅家居用品棄掉, 換上新的, 為新屋帶點新氣息.

剛巧用開的~雅芳婷~床上用品大減價, 當然我呢位小師奶必然入貨啦! 首一天, 我到~荃灣愉景新城的分店選購, 幾位SALES姐姐都好有耐性介紹, 雖然店內非常忙碌, 但她們都面帶笑容, 可是, 大懵的我, 又忘記了自己的床是Queen size 定 King size, 所以有點不知怎麼辦好, 不過, sales 姐姐向我說: [ 不用怕, 雖然是特價品, 但如果真的size不合, 你不要拆包裝, 拿回來, 我們可以更換.] 聽到佢咁講, 我放心買咗兩套, 打算回家看清楚是否合適, 再嚟買過.

返屋企之後, check清楚發覺size合適, 決定明天再買過, 點知原來元朗廣場都有分店, 我當然又為咗慳返車油錢同隧道費, 改去元朗買啦! 點知呢個決定是錯的~~ 

首先一入門口, 見到兩個濃口濃面嘅sales 然後見我睇緊特價品, 就不停喺我旁邊講 : [ 呢d係特價品唔齊款嫁, 有d配唔到冷氣被, 嗰邊正價貨, 齊款齊size]   每當我問一次: [ 呢個款有無queen size呀! ] 佢就只係重複嗰句說話, 我都開始諗~ 白鴿眼, 就算特價都係要比錢啦

全個過程, 佢哋都無對我有過一個笑容, 最後我選擇咗1套床單連多用被, 另外5套床單, 然後去比錢, 佢哋其中一位同事負責收錢, 但係佢個樣好似一d都唔想完成呢單生意咁, 首先係比咗一個好唔順照嘅眼神我

然後就同我講: [ 你呢d全部都係特價品, 唔啱係無得換嫁! ]

咁我就問: [ 咁如果係size唔啱呢? ]

sales: [ 當然都無得換啦! ]

我: [ 唔係喎! 我噚日喺你哋荃灣嗰間買咗兩套, 佢哋話有得換喎!]

sales: [ 小姐, 緊係無可能啦! 你買呢d, 話明係特價品, 緊係無得換啦! ] 仲要勁＊串＊

我: ［ 但係, 係你荃灣嘅同事主動同我咁講喎! ]

sales :[ 點會呀! 我哋做特價就全線做, 買特價嘢, 講明特價就唔會有得換啦!] 呢句說話佢重複咗5次, 每次我想講嘢: [ 但係...] 佢就會講呢句, 好似自言自語咁.

我:[ 姐姐! 你肯定無得換係唔係?]

sales :[ 咁緊係啦! 小姐, 特價貨點會比你換, 咁你係唔係要比錢呀! 多謝你 $ 1,696.]

我:[ 唔駛住, 你咁肯定, 咁即係噚日個sales講大話啦! 你而家打去你公司問吓究竟有無得換先! ]

然後, 佢同我講話寫字樓無人聽, 我話唔更要, 我大把時間, 我等你打通為止, 我而家就自己又打去你哋總公司問吓, 係唔係特價品, 就規定無得換, 但係又會有d分店有得換先.

跟住佢扮打咗一個電話, 就同我講: [ 小姐, ok呀! 可以換比你.]

我:[ 姐姐, 唔係換比我, 呢個唔係比我嘅特權, 係你哋公司本身就有咁嘅服務. 而且我亦都無諗過要換, 只不過, 我覺得好奇怪, 點解你哋同荃灣間舖講嘢唔同啫!  而且由我入門口到而家, 你哋都比我嘅感覺係好睇唔起買特價品嘅客囉! ]

sales : [ 小姐, 咁你係唔係比錢啦? ] ~ 頂! 佢個樣係超級招積呀我即刻火都嚟呀 我: [ 你叫乜嘢名呢? 你嘅態度係極差, 而且我想知道點解,頭先你不停同我講, 話特價品無得換呀? 係你怕d人麻煩要嚟換嘢, 買平嘢又要換哂你d時間呀! 咁係公司規定要講定你自己要講呀?你可以唔好答我, 不過, 我會打去你公司問..]

sales: [ 唔好意思, 小姐, 係我哋自己講, 費事d人成日買特價品都要換啫! ]

跟住一大堆sales廢話, 不斷解釋而家d人買嘢好煩, 佢都係迫不得而先咁講......

講真呀! 如果我唔係太多嘢搞, 我嗰日真係唔買呀! 我費事再抽時間去第2間咋! 而且, 我亦都唔仲意, 佢哋狗眼看人低, 原本我都唔想鬧佢, 話哂自己以前都做咗sales十幾廿年, 點會唔知做sales辛苦呀! 但係做人要識尊重自己同自己份工作, 人哋先會尊重你, 你本身都唔係提供緊優質嘅服務, 而且連應有嘅服務都無, 咁人哋就緊係買得唔開心啦!

大家好嗎? 好掛住你哋呀! 因為最近忙住搬新屋, 所以無時間上網 ~ (好似同世界脫節咁呀!)

今朝終於將嗰52箱恐怖紙箱~K.O哂! 屋企似返個家啦! 新屋企好舒服, 雖然係村屋花園, 四周圍嘅住戶都有養狗狗, 但係一D都唔嘈, 而且唔似以前我住嘅村屋咁, 每座都好近距離, 呢度大家嘅窗門都唔會對住對方, 好有空間感

其實搬屋真係一件好辛苦嘅事, 由其只係得一個人~執嘅時候  而且我完全無諗過, 原來我哋屋企真係好多嘢 搬屋期間, 我每朝都自己少少,少少咁搬D玻璃用品去新屋, 然後順手清潔吓家居, 點知原來每日兩箱都要用4日時間先搬完, 我搬屋用嘅紙並唔係普通細箱, 係每個30X30X24吋嘅大箱. (真係好誇張)

到我每日將D嘢入箱嘅時候, 我先知我平時係將D嘢收藏得太好啦! 我哋今次搬屋, 已經無搬好多嘢, 包括天台所有種嘅花, 戶外木餐枱連椅, 戶外膠餐枱連椅, 雪櫃, 洗衣機, 衣櫃..., 但係我哋兩個人, 可以將一架8頓大貨車迫爆, 要臨時call多間貨VAN先夠搬, 搬屋班大隻佬都話嚇死呀! 兩個人有52箱嘢, 可以多過人哋一家大細嘅嘢, 搞到我好唔好意思呀!

而且住村屋, 上落樓梯比較窄, 好似梳化就要用人手吊上去露台, 先可以搬入屋, 最恐怖係, 佢哋要將我間4呎X4呎嘅狗屋吊上天台, 場面好得人驚o家! 因為要直接拉上天台, 佢哋要兩個人一齊企出天台簷篷, 先可以拉上去, 但係上星期六4/7 嗰日落好大雨, 佢哋如果一滑到, 就會飛落街啦! 我真係好驚呀! 我直情話唔要, 叫佢哋唔好搬, 點知佢哋堅持要搬, 叫我唔好望喎! 嚇死我~ 好彩無事 (大吉利事)

~~ 我又可以煮飯食啦!~~ 之前成3個星期都出街食, 好掛住~住家飯~呀~